Boshqa davlatlar bilan taqqoslanganda O‘zbekistonda internet qimmatmi?

Internetdan qulay foydalanish bir necha omillarga bog‘liq. Bularga quyidagilar kiradi: nominal tarif stavkasi, tarmoqqa ulanish texnologiyasi, simsiz signalning ulanishi, tarmoqning yuklanishi, shuningdek, tashrif buyurilgan veb-sayt sifati va uning serverlariga masofa.

Speedtest ma’lumotlariga ko‘ra, hozirgi kunda dunyoda simli internetning o‘rtacha tezligi 70 Mbit/soniyani tashkil etadi.

O‘z navbatida 100 Mbit/s — bu ko‘plab davlatlar tomonidan taqdim etiladigan o‘rtacha internet tezligi hisoblanadi. Bu kabi tezlik bir nechta qurilma orqali saytlarga kira olishni va 4K formatidagi videolarni ko‘rishni bemalol ta’minlaydi.

Polsha, Ruminiya, Fransiya va Singapur kabi davlatlarda yirik internet-provayderlar bu kabi “past” tezlikni taklif etmaydi.

Polsha va Ruminiyada minimal tarif — 150 Mbit/s, Fransiyada — 200 Mbit/s, Singapurda — 500 Mbit/s. Tojikiston, Turkmaniston va Vyetnamda esa 100 Mbit/s tezlik barchaga ham berilmaydi.