Peterburgda o‘gay o‘g‘il o‘zbekistonlik otasining qotiliga aylandi

Rossiyaning Sankt-Peterburg shahrida 46 yoshli O‘zbekiston fuqarosining o‘ldirilishi bo‘yicha tekshiruv boshlandi. Qotillikda uning 2004 yilda tug‘ilgan o‘gay o‘g‘li gumon qilinyapti.

Hodisa joriy yilning 11 yanvar kuni tunda sodir bo‘lgan. Politsiyaga Peterburgning Vasilevsk oroli tumanidagi ko‘p qavatli uylardan birida erkak pichoq bilan jarohatlangani haqida xabar tushgan.

Voqea joyiga yetib kelgan huquqni muhofaza qiluvchi organ xodimlari erkakni 16 yoshli o‘gay o‘g‘li pichoqlagan bo‘lishi mumkinligini taxmin qilgan. Bola mast holatda bo‘lgan. Erkak tez tibbiy yordam mashinasida jon bergan. Maktab o‘quvchisi esa qotillikda gumon qilib, hibsga olingan.

Ma’lum bo‘lishicha, o‘smir bola bir necha marta ma’muriy qoidabuzarlik amalga oshirib, tarbiyasi og‘ir bolalar ro‘yxatiga kiritilgan. Hozirda hodisa yuzasidan tekshiruv ishlari olib borilyapti.