Buxorodan Toshkentga kelayotgan poyezd manzilga yetmay to‘xtab qoldi

Joriy yilning 14 noyabr kuni Buxoro-Toshkent yo‘nalishida harakatlanayotgan “Afrosiyob” poyezdi manzilga yetmasdan to‘xtadi. Bu haqda "O‘zbekiston temir yo‘llari” Matbuot xizmati xabar berdi.

Buxoro – Toshkent yo‘nalishida harakatlanayotgan 765-sonli “Afrosiyob” elektropoyezdi texnik nosozlik sabab, soat 08:11 da “Baxt” stansiyasida to‘xtagan. Poyezd 1 soatdan ortiq vaqt davomida stansiyada to‘xtab turgan.

Nosozlikni bartaraf qilish choralari ko‘rilgandan so‘ng, shu kuni soat 09:50 da “Afrosiyob” elektropoyezdi o‘z yo‘nalishi bo‘ylab harakatni davom ettirgan. 

“O‘zbekiston temir yo‘llar” AJ rahbariyati yuzaga kelgan noqulaylik uchun yo‘lovchilardan uzr so‘ragan.