Dunyoda birinchi bo‘lib sun’iy go‘shtni sotishga ruxsat berildi

Singapur hukumati dunyoda birinchi bo‘lib mamlakatda laboratoriya sharoitida ishlab chiqarilgan tovuq go‘shtini sotishga ruxsat berdi. Bu haqda 2-dekabr kuni Respublika oziq-ovqat agentligi ma’lum qildi.

«Qabul qilingan takliflar baholangach hamda ularning xavfsizligi aniqlangach, Amerikaning «Eat Just» kompaniyasi yetishtirgan tovuq go‘shtini Singapurda sotishga ruxsat berishga qaror qilindi», — deyiladi hujjatda.

Shu bilan birga, tashkilot rahbari Tan Li Kimning so‘zlariga ko‘ra, «xodimlar mahsulot xavfsizligini baholashni davom ettirishadi, ekspertlar bilan yana maslahatlashishadi, shuningdek, bevosita bozorga kirib keladigan yangi mahsulotlar kuzatib boriladi».

«Eat Just» vakillari bunday go‘sht «tarkibidagi mikroblar nuqtai nazaridan ancha toza ekanligiga» ishonchlari komil.

«O‘tkazilgan tahlillar sun’iy go‘sht tarkibida ko‘p miqdorda oqsil, turli aminokislotalar, foydali yog‘ va minerallar borligini ko‘rsatmoqda», — deya ta’kidlashdi kompaniya xodimlari.

Singapurda sotuvga chiqariladigan sun’iy go‘shtdan tayyorlangan birinchi mahsulot qovurilgan tovuq go‘shti bo‘lishi kutilmoqda.