Sog‘liqni saqlash vazirligi: Borovskiy kollejiga qabul bo‘lib o‘tmaydi

Joriy yilning 15 iyun kuni ijtimoiy tarmoqlarda P.F.Borovskiy nomidagi tibbiyot kolleji yopilayotgani, boshqa qabul amalga oshirilmasligi, O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi bilan bog‘langanimizda hali hech narsa aniq emasligi, bu bo‘yicha hukumatning qarorini kutishayotgani haqida xabar bergan edik.

Yaqinda P.F.Borovskiy nomidagi Toshkent tibbiyot kollejining faoliyati o‘rganish natijalari ham ushbu muassasada o‘quv tarbiyaviy jarayonni tashkil etishda jiddiy muammolar borligini ko‘rsatdi, deyiladi Sog‘liqni saqlash vazirligining saytimizga taqdim etgan hisobotida. Jumladan, kollejda 2 ming real o‘quvchi o‘rni mavjud bo‘lsa-da, bugungi kunda 3 ming 94 nafar o‘quvchi tahsil olmoqda.

Kollejda o‘quvchilar soni uning quvvatiga nisbatan 1.5 barobar ko‘pligi, guruhlarda o‘quvchilar soni o‘rtacha 36-38 nafarni tashkil etishi, o‘quv xonalari yetishmasligi darslar 2 smenada tashkil etilishiga sabab bo‘lgan. Bu esa o‘quvchilarning darsdan bo‘sh vaqtlarida to‘garak mashg‘ulotlariga jalb etilishini cheklab qo‘ygan, ya’ni qo‘shimcha mashg‘ulotlarni o‘tkazish uchun bo‘sh auditoriyalarga juda katta ehtiyoj sezilgan.

Qolaversa, o‘quvchilar sonining ko‘pligi jismoniy tarbiya darslarini sport zallarida tashkil etishda o‘quvchilarni to‘liq qamrab olish imkonini bermaydi. Ya’ni, ayrim guruhlarga jismoniy tarbiya darslarini o‘tish imkoni bo‘lmagan.

Bundan tashqari, kollejning faollar zali ham yo‘q. Bu holat o‘quvchilar o‘rtasida ma’naviy-axloqiy, tarbiyaviy ishlarni tashkil etish, ota-onalar yig‘ilishlarini o‘tkazish imkonini bermaydi. Ustiga-ustak, uch ming nafardan ortiq o‘quvchi tahsil oladigan ushbu kollejning Axborot resurs markazi o‘quv zali bor-yo‘g‘i 34 o‘quvchiga mo‘ljallangan, xolos.

Umuman, darslarning 2 smenada tashkil etilgani, o‘quv xonalarining barchasi bandligi, ta’lim muassasasida o‘qituvchilarning o‘z ustida ishlashi, ota-onalar bilan ishlash, darsdan tashqari ishlarni tashkil etish, psixologik xizmat ko‘rsatish, ma’naviy-ma’rifiy, tarbiyaviy ishlarni tashkil etishda jiddiy muammolarni yuzaga keltirgan.

Yuqoridagilarni inobatga olib, Toshkent shahridagi P.F.Borovskiy nomli tibbiyot kollejiga 2017-2018 o‘quv yili uchun qabul to‘xtatilishi yuzasidan tegishli takliflar tayyorlandi. Mazkur takliflar O‘zbekiston Respublikasi ta’lim muassasalariga qabul qilish bo‘yicha Davlat komissiyasi hamda Toshkent shahar hokimligi huzuridagi 9-sinf bitiruvchilarini akademik litsey va kasb-hunar kollejlariga qamrab olish bo‘yicha Muvofiqlashtiruvchi Kengashga taqdim etildi.

Mazkur vakolatli organlar tomonidan mazkur ta’lim muassasasining kelgusi faoliyati bilan bog‘liq tegishli qarorlar qabul qilinadi.

Eslatib o‘tamiz, joriy yilning 1 iyun kuni Toshkent shahrida joylashgan P.F.Borovskiy nomidagi tibbiyot kolleji o‘quvchisi Jasurbek Ibohimov o‘z tengdoshlari tomonidan o‘ldirilgan edi.