O‘zbekiston fuqarosi Rossiyadagi baxtsiz voqea qurboni bo‘ldi

Rossiyaning Sverdlov viloyati Verxniy Tagil shahrida joylashgan “Svinsovaya kompaniya” sanoat korxonasida yirik yong‘in yuzaga keldi. Qo‘rg‘oshin korxonasida ro‘y bergan yong‘in o‘zbekistonlik fuqaroning o‘limiga sabab bo‘ldi. Bu haqda “Vestnik Kavkaza” agentligi xabar bermoqda.

Ma’lumotlarga qaraganda, voqea oqibatida qurbon bo‘lgan O‘zbekiston fuqarosi mehnat shartnomasi bilan shu korxonada ishlagan. Yong‘in yana 3 kishining yaralanishiga sabab bo‘ldi. Ular zudlik bilan shifoxonaga yetkazildi.

Dastlabki surishtiruv natijalariga ko‘ra, yong‘in metalni qayta eritish uchun ishlatiladigan qozonning portlashi oqibatida yuzaga kelgan. Ayni vaqtda yuz bergan voqea yuzasidan jinoyat ishi ochildi.

Durdona Rasulova