O‘zgidromet shoshilinch ogohlantirdi

O‘zgidromet direktori Sherzod Habibullayev Respublikaning to‘rtta viloyatida sel-suv toshqini yuzaga kelishi mumkinligidan ogohlantirdi. Bu haqda u Facebook'dagi sahifasida ma’lum qildi.

Qayd etilishicha, 5-7 iyul kunlari yomg‘ir yog‘ishi kutilayotgani sababli, respublikaning tog‘oldi va tog‘li hududlarida sel-suv toshqini hodisalari yuzaga kelishi mumkin.

Unga ko‘ra, quyidagi hududlarda ehtiyot choralarini ko‘rish so‘raladi:

• Toshkent viloyati – Ohangaron, Bo‘stonliq, Parkent, Piskent, O‘rtachirchiq, Yuqorichirchiq tumanlarida va Angren, Olmaliq shaharlarida;
• Namangan viloyati – Pop, Kosonsoy, Chortoq, Chust, Namangan, Yangiqo‘rg‘on tumanlarida;
• Farg‘ona viloyati – So‘x, Shohimardon, Farg‘ona, Beshariq tumanlarida;
• Andijon viloyati – Andijon, Asaka, Jalaquduq, Qo‘rg‘ontepa, Paxtaobod, Izboskan, Xo‘jaobod, Marhamat tumanlarida va Xonabod shahrida.

“Tog‘oldi va tog‘li hududlarda istiqomat qiluvchi fuqarolardan ehtiyot choralarini ko‘rishlarini so‘raymiz”, deydi Sherzod Habibullayev.