Farg‘onadagi YTHda ikki nafar yosh yigit halok bo‘ldi

Farg‘ona viloyatining Oltiariq tumanida avtomobilning betonga urilishi oqibatida ikki nafar yosh yigit vafot etdi.

YTH Oltiariq tumani “Tegirmonboshi” MFY hududidan o‘tadigan “4R-112” Farg‘ona halqa avtomobil yo‘lining 235-kilometrida sodir bo‘ldi.

Bu haqda viloyat IIB ma’lum qildi.

Qo‘qondan Farg‘onaga harakatlanib kelayotgan Nexia rusumli avtomobil haydovchisi boshqaruvni yo‘qotib, yo‘lning o‘ng tomonidagi beton to‘siqqa urilgan.

YTH oqibatida avtomashina majaqlanib ketgan. Hodisa oqibatida 19 yoshli haydovchi va 21 yoshli yo‘lovchi vafot etgan. Boshqa bir yo‘lovchi tan jarohatlari bilan shifoxonaga yotqizilgan.

Hozirda mazkur holat yuzasidan tergovga qadar surishtiruv ishlari olib borilmoqda.