39 yoshli ayol kana chaqishi tufayli hayotdan ko‘z yumdi

Qozog‘istonning Jambul viloyatida zaharli kana oqibatida o‘lim holati qayd etildi. Bu haqda “Nur.kz” sayti xabar bermoqda.

Bayzak tumanida yashagan 39 yoshli ayolda Qrim-Kongo gemorragik isitma juda kech aniqlandi. Ayol shifoxonada oshqozonidagi og‘riqdan shikoyat qilgan. Shifokorlar uning oshqozon yarasi borligini aniqlashdi va bir necha kun davolashdi. Uni zaharli kana chaqqani esa keyinchalik ayon bo‘ldi.

Bemor ayolning salomatligi davolanishning 3-kuni yanada yomonlashdi. Shu kuni u ko‘p qon yo‘qotdi, shifokorlar esa buning oldini olishga ulgurishmadi. Natijada ayol vafot etdi.

Hozirda marhumaning barcha yaqinlari, jumladan, uning 5 farzandi, bemorga g‘amxo‘rlik qilgan 36 nafar tibbiyot xodimi Qrim-Kongo gemorragik isitma infeksiyasi bor deya gumonlanib, shifokorlarning qat’iy nazorati ostiga olingan.

Durdona Rasulova